Berritzeguneetan lan egiteko ahozko defentsa gaztelaniaz egin ahal izango da

2023-05-25

Araba, Bizkaia eta Gipuzkoako Berritzegune Nagusirako zenbait laguntzailerentzako lan deialdia egin du Hezkuntza Sailak 2023-2024 ikasturterako eta iazko deialditik aldaketa “esanguratsu” eta “kezkagarri” bat dago: ahozko aurkezpenean iaz “defentsa euskaraz egingo da” jartzen zuen eta aurtengoan “defentsa ahal bada euskaraz egingo da”.

 
 
Berritzeguneetan lan egiteko ahozko defentsa gaztelaniaz egin ahal izango da

Irakasleen eta ikastetxeen aholkularitzan, prestakuntzan eta berrikuntzan arituko diren laguntzaileei ez zaie euskaraz mintzatzeko gaitasuna neurtuko, eta beraz, agian euskaraz hitz egiteko nahikoa gaitasunik ez duen aholkulari batekin egingo dute topo Berritzegunera jotzen duten irakasleek eta hezitzaileek. Gaztelaniaz mintzatu beharko dute euskarazko irakaskuntzan diharduten irakasleek Berritzeguneko aholkulariarekin? Gaztelaniaz emango dizkie azalpenak eta aholkuak?

Hezkuntza Sailak adierazi du motibo “juridikoak” daudela aldaketaren atzean, “ja hizkuntza eskakizuna ezarrita, ezin dela behartu probak hizkuntza ofizial bakar batean egitera”. Kontseiluko idazkari nagusi Idurre Eskisabelek adierazi du Berrian "oldarraldi judizialaren efektuetako bat" dela, horrek "neurri kontserbadoreak hartzea eragiten duelako". Horren aurrean, "lan hori egiteko hizkuntza gaitasun egokiko langileak" behar direla dio, eta "uste dugu probaren defentsa euskaraz egitea berme ezion hobea dela hor behar den gaitasuna egiaztatzeko".