‘Ongi-etorri lagun’ CDa eta antzerkia eskuragarri

2018-03-01

Musika eta antzezlana eskutik integrazioaren alde.

Zenbait euskal abestirekin batera, munduko hainbat herrialdetatik Bilbora etorritako haurren tokiko abesti tradizionalak bilduta, ‘Ongi etorri lagun’ izeneko CDa kaleratu du Kurkuluxetan kultur elkarteak. Izen bereko antzezlana ere martxan dute, kanpotik datozen haurrei ongi-etorria egin eta haien integrazioan laguntzeko xedez sortua.

 

 
 

Kanpotik Euskal Herrira etorri diren haurren errealitatea islatzea eta haien gizarteratzea nolakoa den erakustea helburu hartuta, Ongi etorri lagun CDa plazaratu du Kurkuluxetan kultur elkarteak. Hala diote: “CD honen bidez haur guztien integrazioaren aldeko aldarria egiten dugu, norberaren kulturatik abiatuta eta Euskal Herriko errealitatera hurbilduz. Plazaratutako disko berri honen bidez gure begikotasuna adierazi nahi izan diegu Euskal Herrira iritsi diren milaka haurri, beraiek ere gure gizartearen zati bat direlako, eta haiekin batera eraikiko dugulako etorkizuneko herria”.

Hala, 13 abestiz osaturiko CDa egin dute. Horietatik bi euskara hutsez daude idatzita eta beste bat —Lantzeko Inauteria— euskal tradiziokoa da. Baina gainerako hamar abestiak osatzeko, munduko hainbat herrialdetatik heldutako umeen tokiko kanta tradizionalen bertsioak egin dituzte: Zambia, Angola, Bolivia, Sahara, Errumania, Errusia, Nikaragua, Txina… Abesti horien guztien jatorrizko musika errespetatu da. Zenbait estrofatan hizkuntza ere mantendu da; beste batzuetan, berriz, euskarazko itzulpena sartu dute.

Lan hau burutu ahal izateko, hainbat abeslariren kolaborazioa izan du Kurkuluxetan elkarteak. Jatorrizko hizkuntzetako hitzen euskarazko bertsioak Koldo Zelestinok egin ditu; musikaren konponketak egiten, berriz, Jose Ramon Gutierrez aritu da; eta abestien melodia berriak Itxaso Azkonak sortu ditu. Ahotsak jartzen, abestien jatorrizko herrialdeetatik etorritako haurrak ez ezik, Arrigorriagako Artizarra musika-eskolako ikasleak aritu dira. Amaitzeko, proiektua Rita Naveirak koordinatu du; diseinua Atoan! Komunikazioak; eta argitara-tzailea Erroa argitaletxea izan da.

CDa eskuratu nahi duenak umegunea@gmail.com helbidera idatzi behar du.

 

Antzezlana ere bai

13 abesti biltzen dituen CDa kaleratzeaz gainera, izen bereko antzezlana ere egin dute. Ongi etorri lagun antzerki lanarekin ere, CDarekin bezalaxe, Euskal Herrira datozen haurren errealitatea islatzen saiatu dira eta haien integrazioa nolakoa den erakusten. Antzezlana musikala da eta CDan jaso dituzten abestiak obran ere kantatzen dituzte.

Antzerki lanean kontatzen denez, Mari Leka eta Panpoxa ikastetxe berean dauden bi neska dira. Egun batetik bestera haien eskolara kanpotik etorritako hainbat haur iristen dira: batzuk gurasoek ekarrita, beste batzuk gerratik ihesean, badaude adoptatutakoak ere… baina den-denek euren hizkuntza eta euren abestiak ekartzen dituzte. “Edozein kasutan, zergatik erabaki dute euren herrialdea utzi eta Euskal Herrira etortzea? Muturoker pertsonaia gaiztoa gerrak, goseteak eta haur askoren zorigaiztoa sorrarazten ari da. Zer egingo dugu Muturoker kanporatzeko? Lagunduko diguzu haur hauei ongi-etorria ematen elkarrekin euskaraz bizitzeko?”.

Antzerkia ikusi nahi izanez gero, datorren martxoan, apirilean eta maiatzean hainbat emanaldi egingo dituzte Euskal Herriko hamaika txokotan. Informazio gehiago www.kurkuluxetan.eus webgunean eskura daiteke.

 

 

INFORMAZIOA

‘Ongi etorri lagun’ CDa eta antzerkia

Ekoizlea
Kurkuluxetan elkartea
www.kurkuluxetan.eus

CDa eskuratzeko zer egin?
umegunea@gmail.com helbidera idatzi.

Datozen antzerki emankizunak

  • Martxoak 19: Alegia
  • Martxoak 16: Abusu
  • Martxoak 18: Aretxabaleta
  • Martxoak 20 eta 23: Etxebarri
  • Apirilak 13: Aramaio
  • Apirilak 20: Orkoien
  • Maiatzak 11: Zeberio