Laborategietako izen-ematea irekita

Eguneroko erronkei eta beharrei aurre egiteko moduko eskaintza prestatu dugu. Astean zeharreko lau saiotan, gaiak aditu batekin aztertuko dira eta parte-hartzaileek eguneroko kezkak, zalantzak eta bizipenak partekatzeko aukera izango dute. Modu horretara, gelara tresna berriekin itzultzeko.

Irakasleen ibilbide profesionalean sortzen joaten diren kezkak, zalantzak eta galderak ez dira beti berdinak izaten. Une bakoitzaren arabera, erronka eta behar desberdinak ager daitezke eta etengabeko prestakuntza horiei erantzuteko modua izan daiteke. Hori guztia kontuan hartuz osatu du Hik Hasik 2026-2027 ikasturteko Laborategiko eskaintza.

0-3 zikloan ari den irakasleak haurraren zaintza uneak izan ditzake ardura nagusi. Eider Gardek eskainiko duen 0-3 urteko haurren zaintzak laborategian haurrekin zaintza uneak nola egin ikasiko da. Alvaro Beñaranen eskutik, berriz, Haurra subjektu autonomotik subjektu komunitariora izeneko laborategia izango dugu. Gaur egun indibidualismoa da nagusi eta komunitatera begira jartzeko beharra azpimarratzen dugu maiz. Txiki-txikitatik has gaitezke lantzen eta horretan lagunduko digu Beñaranek.

Ikasgelan gatazkak sortzen direnean nola jokatu dezakegun, gatazka horiek nola kudeatu ditzakegun ere kezka iturri izaten da maiz. Horiei aurre egiteko tresnak eskuratzeko aukera izango da Oihana Zabaletaren eskutik: Begirada errestauratiboa bizikidetza sustatzeko laborategiarekin.

Irakasleen arteko bileretan eta erabakiak hartu behar direnean ere gatazkak sor daitezke. Horrek sarritan kezkatzen gaitu. Nola hartzen ditugu erabakiak? Nola har ditzakegu? Funtsezkoa da momentu horiek ongi kudeatzea eta Elkarrizketa Argudiatu Kooperatiboa tresna baliagarria da horretarako. Jakinmin elkarteko kideek tresna hori erabiltzen erakutsiko digute Elkarrizketa Argudiatu Kooperatiboa bizikidetzan: gatazken prebentziorako proposamen bat laborategiarekin.

Hezitzaileen ongizateari buruz ere asko hitz egiten dugu azken garaiotan; gainezka daude gehienak egunerokoan pilatzen zaizkien zeregin eta eskakizun guztiei aurre egin ezinik. Denborarik eskaintzen al diogu, ordea, geure burua zaintzeari? Eneritz Muguruzak Hezitzailearen ongizatea ardatz: zeure burua zaintzeko tresnak izeneko laborategian ongizatea zaintzeko gakoak emango ditu.

Estrategiak eta tresnak

Haurrek nola ikasten duten eta euren buruak nola funtzionatzen duen azalduko du, bestalde, Feli Oregik Neurogarapena, hazkuntza eta ikasketa prozesuaren oinarrietako bat laborategian. Haurren neurogarapenean arreta jartzeko gakoak eskainiko ditu Oregik.

Geletan aniztasun handia dago gaur egun eta ikasle bakoitzak era jakin batean ikasten du. Irakasleak ikasteko estilo eta estrategia horiek ezagutzea lagungarria da ikasleekin aritzeko. Horretarako Ikas-estiloen eta ikas-estrategien garrantzia hezkuntzan laborategia eskainiko du Iñaki Pikabeak.

Gure bizitzan sartu den adimen artifiziala lagun edo oztopo ote den ere ez dugu argi askotan. Noiz eta nola erabili dezakegun ikasteko, Adimen artifizialak noiz eta nola? Erabilera arduratsua eta etikoa hezkuntzan laborategia izango dugu Danel Solabarrietaren eskutik.

Elena Laizek gaur egun kezka handia sortzen duen gaiari erantzungo dio Psikogenesia, idazketa-sistemaren ikaskuntza-prozesua laborategian. Nola lagundu ikasleei irakurtzen eta idazten ikasten? Zein printzipioren arabera? Zer-nolako esku-hartzearekin?

Wikikasiko kideek, berriz, DBHn erabiltzeko ikas-egoera libreak erakutsiko dituzte. Denen eskura daude hainbat ikas-egoera ikasgeletan martxan jartzeko gakoak emango dituzte.

Izen-ematea jada irekita dago.