Azken albisteak
Hezkuntzari loturiko gaiak eta ahotsak hedatzen ditugu, profesionaltasunez, euskal ikuspegiarekin eta aditu eta kolaboratzaile sare zabalarekin lankidetzan.GURE KIDEARI ELKARTASUNA
HIK HASI aldizkariko kideen oharra komunikabideei eta euskal jendarteari:
Lehenik eta behin, Espainiako Poliziak atxilotutako Olatz Lasagabaster lankideari eta haren etxekoei elkartasuna adierazi nahi diegu. Aldi berean, haren errugabetasun presuntzioa errespetatzea ere eskatzen dugu. Une honetan dugun informazio eskasaren arabera, komisarian inkomunikatuta dago. Horregatik, une oro haren eskubideak errespetatuak izan daitezela eskatzen dugu, horretarako, besteak beste, berehala inkomunikazio egoera hori bertan behera utzita.
Halaber, Espainiako Poliziak HIK HASIko egoitzatik eramandako ordenagailua eta bertan dauden aldizkari eta monografiko berrietarako materiala ere ahal bezain laster itzultzea nahi genuke, euskal hezkuntzaren aldeko gure eguneroko lanean normaltasunez jarraitzeko beharrezkoak baitira.
Eusko Jaurlaritzako Hezkuntza sailburuak A ereduan euskara "indartu" nahi omen du.
Eusko Jaurlaritzako Hezkuntza sailburuak nabarmendu du A ereduan euskara "indartzea" beharrezkoa dela, baina betiere hizkuntza hautatzeko askatasuna errespetatuz.
Hegoaldeko 10 ikasletik 9k gainditu dute selektibitatea
Araban, Bizkaian eta Gipuzkoan ikasleen % 96,21k gainditu dute unibertsitatera sartzeko hautaproba, eta Nafarroa Garaian, berriz, ikasleen %93,18k. Lapurdin, Nafarroa Beherean eta Zuberoan gaur amaituko dute baxoa.
Kaixo, lagun!
Ari gara X. UDAKO TOPAKETAKei azken ukituak ematen.
Uztailaren 1, 2 eta 3an Donostian eskainiko diren ikastaroak 26 izango dira, eta 531 lagun haietan arituko direnak.
Ikastaroek 57 emaile bilduko dituzte, gainera. Horietako 5 Euskal Herriaz kanpotik etorriko dira: Itziar Plazaola, Suitzatik; Juan Mata, Granadatik; Pere Mayans, Bartzelonatik; eta Adolfo Romero eta Francisco Lopez, Extremaduratik.
Gure esku dagoena ahalik eta txukunen egiten ahalegintzen ari gara. Hala ere, dena ez dugu alde izango.
Hezkuntza Saileko GARATU programak atzo telefonoz jakinarazi zigun aurtengo Topaketei eta heldu den urtean aldizkariari ez diola laguntzarik emango: zero euro.
Bilera eskaria egin genien, urjentziaz, eta horren erantzuna izan da % 30ko murrizketa egingo diotela iazko topaketetako laguntzari, baina aldizkariak ez duela ezer jasoko.
Bilera egiteko ez omen dute astirik.
Erantzun horren aurrean, gaur, berriro, bilera egiteko beste eskaria luzatu diegu. Egoera berri horrek datorren ikasturterako aurreikusita genuen plangintza hankaz gora bota lezake, horregatik, egoera ez bada berbideratzen neurriak hartzen hasi beharko dugu.
Izango duzue gure berri.
Euskal Herriko Ikastolak kooperatiba sortu dute
Euskal Herri osoko ikastolak bilduko dituen kooperatiba sortu dute. Euskal Herriko Ikastolak izango da horren izena eta Koldo Tellitu izango da presidentea. Irudi bakarra duen erakundea da, ikastolentzat eta gizartearentzat gertuago egongo dena. Ikastola bakoitza indartzea ere, kooperatiba berriaren lana izango da.
Seaskak eta Frantziako Hezkuntzak akordioa sinatu dute
Seaskak eta Frantziako Hezkuntzak datozen hiru urteetarako akordioa sinatu zuten ostiralean Baionan. Horren arabera, datozen hiru urteetan 11 irakasle gehiago izango ditu Seaskak lehen mailetarako.
Haurren eguna egingo dute igandean Kanbon
Seaskaren 40. urteurrena ospatzeko, festa egingo dute datorren igandean Kanbon. Haurren eguna deitu dutenak egitarau zabala eskainiko du 10:00etatik aurrera.
Hiru eleko hezkuntza sistemaren alde egingo du Eusko Jaurlaritzak
Isabel Celaa, Eusko Jaurlaritzako Hezkuntza sailburuak iragarri duenez, 2010erako egungo hizkuntza ereduak gaindituko dituen proposamena egingo dute. Horrez gain, A eredua hobetzeko neurriak iragarri ditu Celaak.